Racconto di un migrante di inizio ottocento

Per gentile concessione di don Angelo Trevisan, già parroco di Ponzano e coautore del volume “Ponzano – Note storiche”, riporto il bel racconto di Cattarin Giovanni Battista, classe 1896, deceduto nel 1984.
A 85 anni in dialetto e con qualche lacuna, ma con estrema lucidità, racconta la sua epopea.

“Mi gavea sentio da la me maestra che Viena gera la capitale dell’ lmpero Austro Ungarico e ne la me testa gera nata l’idea che la se podeva magnar ben. A casa nostra co’ la poenta vegneva sartada sul tajer, el fumo nol fea tempo a ’rivar sul sofito. Me mare, poareta, gavea capio el me sogno de scampar da casa, anche parche me pare in osteria el me gavea sciafona.

La storia xe presto dita: me nono da parte de me mare, romai a s. Paolo in Brasil el voleva co’ lu un so nevodeto e mi ciaro e neto gaveo dito “Vao mi co’ me nono!”. “Ti te ’ndarà co’ to nono, macaco!? ti te sta a casa co mi!” e xo na sberla. Ma la gera na sberla che la me stava dentro. Senza dirghe gnente a nissun (ma me mare lo saveva!), ai primi de april del 1905, con un fagoteo e meza pinza, parto: a piè, po’! Co’ gero stufo (intanto la pinza calava!) me visinavo a ’na casa de contadini, vedevo i pajeri, e ghe domandavo da dormir, in stala, so’l fienil; e cosi so ’riva a Tarvisio. Me pare, desperà, intanto el gavea denuncià la me scomparsa.
E me mare “tasi”.

Ndavo su e zò pai binari; un migrante furlan, che gera sul vagon el me domanda “Cossa serchito?”  e mi: “Voi rivar a Viena!” e lu me ciapa e me tira su, in vagon. Cossì go passa la frontiera e ad Arnod-ldstein (me ricordo ancora el nome) el me mola zò. E mi pecche! Gero za in Austria e pian pian, in do mesi, rivo a Viena! Me fermavo so ’e case dei contadini anche do tre giorni e faxevo mestiereti, tanto da ciaparme na scianta da magnar. A Viena la prima sera e anca la seconda tuto passa lisso; ma i gendarmi me becca al terzo di, e i me domanda i documenti; mi ghe digo che go perso le carte; i ghe telegrafa a Spresian e el cursor ciapa me pare e el ghe dise: “Varda che to fiol el xe a Viena in bone man”.

Intanto i me trova da portar acqua ai omeni che lavorava sui acquedotti; al sabo i me dava na corona e mi ‘ndavo al “pater” e me divertivo; ghe gera sento bersaglieri che sonova la fanfara. I me dava un goto de bira, tuto pagà da “Cecco Beppe, ma bisognava ‘ver le scarpe lustre! Ogni tanto ‘ndavo a messa; tanto, no’ i gera miga tuti col papa! Cossi go passà sie mesi; de tornar casa non gavea voja e quando i me ga lassà libero (dandome tuti i me schei), mi, ciapa el treno e la me vaiseta (nessun gavea vaize ’lora!) e son ’nda a Coln (Colonia). La i me spetava; i austriaci gavea vertio i tedeschi che i me trovasse un lavoro su ’e ferovie.
Un capo un di me dixe: “Vien lavorar co mi sue miniere verte (a cielo aperto).

Ze dure ’e miniere: gaveva sedese ani e su la Ruhr, so’ riva fin a 900 metri soto tera e ’na volta se ga ’lagà tuta la galeria e mi, svelto come un gato, me son butta su par ’e scae e me son salva. Gò riscia la pee ‘naltra volta: sue ferovie (perchè gera torna la). Fazevimo el ponte sul Reno, sempre a Colonia e lavoravimo in tre “in campana”, se rompe el motor che dava pression, se no scampo fora da quea preson, saria da un toco un pesce nega! Me ga tira su do zovanotti che gera in barca; i stava a divertirse, gera el luni dee feste, drio meodi; noaltri lavoravimo a turni, di e note, anca Pasqua. Tanto savi ben che “con aqua e ciacole no se fà fritole”. Me tocava sempre darghe soto! Ghe gera poco da ridar: la domenega bisognava lavarse i calseti, le braghe e la camisa e gera finio tuto; fursi qualche partia de bae coi amisi (de tute ’e generazion: polachi, croati, rumeni, serbi, taliani…). Qualcosa me son anca divertio: Un di partimo in tre (uno co ’a chitara) e ’ndemo a Mosca.

Passemo per Danzica (che gera tedesca) e Varsavia e coremo fin che porta el treno; ciapemo na slita per rivar al treno dei russi, che gaveva un scartamento difarente dal nostro. Fredo da morir! lnsoma, rivai a Mosca, semo stai solo do di; non se capivimo nè lori nè noaltri! Intanto, uno dei tre, se gera sfanta. Tornemo par Bucarest, rivemo a Budapest: me mancava diese fennig par tor el bilieto par Viena. Na sioreta me vede cosi poareti e dixe “Per i giovanotti ecco i dieci fennig”. Che Dio la gabia in gloria! A Viena gerimo al verde da novo e cosi ghemo pensa de tornar a casa a piè, fin Trieste; el me amigo sonava ’a chitara, mi col capeo facevo un gireto tra i magri clienti.

Da Trieste, in treno rivo a Spresian; vao casa, vedo na scianta me mama e i mii, ma non me fermo! su da novo in Germania. Tuto quel tempo non me gera miga passa da la testa de ’ndar catar me nono! Gero sta a Parigi e a Brussel; a Dresda e a Lipsia; ad Amsterdam e Aquisgrana e na volta capito ad Amburgo, in macchina (le gera ’e prime!), col me ingegner.

Trovo el capitano de un bastimento a vapor; el me domanda se voi ’ndar con lù: la nave gera direta in Brasil, dove stava me nono. Mi tol la me vaiza, e parti. Ma a Gibilterra (la nave dovea far scalo) ’i inglesi ’i me cata sconto in stiva sul carbon, e i me rimanda indrio! Me gà dispiasso par me nono! Par magnar, ogni di de qualcossa me ’rangiavo; par dormir ’na vedova, co’ tre fie, me gaveva da ’na camareta e mi pagavo regolare. Non ste pensar che fusse un sbrega mandati. Mi go sempre porta rispeto e ’i altri me rispetava mi. Na sera, riva dei parenti de sta vedova e par mi non ghe saria sta posto… Dopo un tocheto me ciama la parona e la me dixe: “Joan, ti te dormi, sta note, su la camera dove ghe Xe anca me fia”. Mi rispondo: “Parona, sta roba, mai pi”. Ea me replica: “Joan, mi te conosso, ti te si un toso de stima e ti te poi dormir benissimo su quea camera”. Xe sta el più bel elojo de tuta la me vita; vedar in che stima gero tegnuo parfin dai tedeschi.

Dopo so vegnù a casa, e go fato la guera, gò ciapà na ferita all’arma bianca, a Gorizia, anca proposto alla medaja d’arzento; go fato la ritirata; i me ga ciapa prìjoniero e son scampà…

Finia ’a guera, del ’20, torno a Colonia, sol solito paeseto, fora de Essen, e serco quea bona vedova. El paese gera tuto spiana; disastri de ’a guera. Na veceta me ga sigà drio: “Ma ti te si Joan!” e la me fa capir che gera morta dae bombe sia ’a mama e sia ’e tose. Cosi me xe passa anca ’a voja de star fora pa ’1 mondo e so torna casa. Me son marida con la Rita e ’desso son qua vecio coi me ricordi: tanti e anche bei”.