La mare der Mancio

Dopo chéa nòte de inverno del ‘44
che ga visto el to calvario,
ricordo mare al morir straco del di
el to ciamàr disperà, squasi un çigo,
che scaturia i nostri zòghi de putèi
e sbregava la chiète de chel presepio
de pore case e canpi magri
‘fa la fame de chéi dì.
Do nomi ciamài, urlai a pièn boca
su su dal fondo dée to vessare.
pì de chel di che te i gà partorii.
El to dolor urlà in chéi do nomi
‘fa baulàr tristo de can,
gà inpinio de paura e de parché
‘e nòti longhe de quei ‘sconti
e gà consumà la to vita, mare,
poro mùcio de strasse, de ani fadigài
e de parché sensa risposta.
Pora creatura, vitima inocente ‘fa lori.
restài, in chéa note grèva de caìvo,
inciodài da na mitralia ‘cifa’
drio ‘a riva de un fosso sensa nome
el pèto verto fa ‘na rosa rossa a magio.
Jèro cèo, l’ora
ma grando quanto basta par capir.
Da chél di, el to dolor grando, mare
e el sacrificio ultimo de to fioi
me i porto dentro fa seménsa bóna.
Seménsa che no gà presso
e se ciama: Llbertà.

Emilio Gallina

Vénare Santo del ‘44

El me paréva un zògo
chél Vénare Santo a un bòto.
Un zògo tristo, co’ bonbe,
distrussión, morti e rovine.
Massa, par ‘na çità cussì picenina.

Sète april, Vénare Santo del ‘44.
Su chéa ranpa de scae
in Via Carlo Alberto,
un spàsemo negro de paura,
mama a pièn bóca,
un urlar grando spasemà
dentro e fòra de mi,
da no’ capir pi’ gnénte.

Solo un brassà de me mama.
‘A so voçe calma,
ne ‘a so gran paura,
che çercava de chietarme.
de dirme chelcòssa.
E so strénsarme stréto
ai tónfi pi’ fòrti;
par tuti, tanta, tanta paura.

Vénare Santo:
un bòto e un quarto.
Siénsio de bòto.
Fora, pólvare e fumo
inmatonia el sól ciaro de april.
‘Na siréna. El cessato alarme.
Tuto finio? No!
El calvario de tanti trevisani
scumissiàva e se compiva
tra un bòto e un bòto e un quarto
de chèl Vénare Santo

Emilio Gallina