Mariù Salvatori de Zuliani

(tratto da A tola co i nostri veci , Franco Angeli Editore 1979)

Me xe capità de lezar (no ricordo indove) l’articolo de un çerto scritor, che no’l gaveva pensieri più grandi che quelo de domandarse: Ma esistela davero, o no esistela, na vera cusina veneta? E co un mucio de ragionamenti inverigolai, lù te spiega che no, no la pol proprio essarghe, parchè a somengiansa de la nostra mascara Arlechin Batocio, el Veneto ga un vestito a taconi de tanti colori descompagni, cusii su insieme a la mancopezo, secondo le combinassion politiche de’l momento, traverso i secoli (...)

Ciò, no xe par tignerlo in conto de mato, ma sto scritor benedeto me par proprio che no’l gabia capio un zero de quela che, gastronomicamente parlando, la xe invesse la virtù più granda e più carateristica de la nostra cusina! Ossia, che xe un sapiente misioto de gusti e de abitudini difarenti; un scambio in famegia (dato che ormai se trovemo tuti ligai in t’un steso mazo!) de quel che produxe le nostre tere venete; un adatamento de usanse e de tradissioni che a pian pianeto le gà scavalcà i so confini de nassita, deventando patrimonio de tuti noialtri!

Par sto fato qua, ne xe rivae a Venessia le castagne cadorine, a Trento el bacalà a la visentina, a Verona i canederli tirolesi e el radicio trevisan in casa de i furlani!

E le “spezie”, creature, gerele o no gerele el vanto de la cusina venessiana e veneta prima che ghe insegnassimo a dopararle a tute st’altre cusine foreste italiane?

Po, no desmenteghemose che basta de metarli davanti a na bela polentona zala (la gran regina de la nostra tola!), parchè tuti i veneti de tute le raze – furlani, ciozoti, de Bassan o de Marostega – i se conossa fradei de anema, ciapandose magari a brazzacolo! Altro che taconi descompagni cusii su a la mancopezo!

In quanto a sto confronto co’l vestito de Arlechin (siben che no’l me piaxa), portemo pasienza! Miga tuti i scritori xe boni de far i spiritosi… co spirito! Stoquà, povareto, el fa anzi capir de essar scarseto de fantasia, o come se dixe a Venessia, un pochetin… zò de taco!

Ma, tornando a la nostra cusina, par darghe sicurassion a tuti quei che i dubita che la esista (e che paraltro, parlando co na çerta rusteghessa, se podaria ciamarli ignoranti!), prinçipiemo subito a sbandierarghe soto el naso le glorie gastronomiche de la nostra tera e a farghe sentir la vogia de sentarse a tola co noialtri, che conservemo ancora le bele tradission ereditae da i nostri veci!