Sezioni

A Spasso per le Antiche Osterie di Ponzano

La partia de boce

(Gino Tomaselli, da Aria canpi e sol)

Mi, co me cato insieme coi me amissi
par na partìa de boce in ostaria,
su uno dei quei zoghi slissi, slissi,
che le bàe le te scanpa e sbrissa via,
tiro, me cùcio e po’ ghe coro drìo,
fassèndoghe la mossa col dadrìo:

sicome zogo mal e son na s-ciapa,
mi go na bala, e el me conpagno do:
ma co perdèmo, mostro, el se la ciapa
senpre co mi, che pèrtego su e zo,
fin che rivo de corsa sul baìn,
sigando: “vien de sponda, pinpianin:”

el me compagno co do bàe, se grata
prima na rècia, e po el dadrìo che spissa;
el se frega na man su na culata,
che la bàla a le volte, no ghe sbrissa:
el varda, el struca n’ocio, el tol la mira,
e finalmente co sie passi, el tira:
ma col nervoso e col tirar in pressa,
el me sbocia el baìn de prepotensa,
donàndoghe sie punti: go me nessa
che varda, ride, e sarta a chi xe sensa,
el vin nei goti: el sol dadrìo dei rami,
zogàtola anca lu, fando ricami.